KALANGSU 36

K A L A N G S U

Yasana : Titin Wiarti

Bagian ka-36

Kuring tinggal ngabuktikeun cintana Andi ka kuring wening keur kuring atawa ngan ukur ngabangbalérkeun Kinan. Kuring ogé embung ngan saukur dijieun sérep. Kuring jeung Kinan boga haté nu béda.

Kuring ngarep-ngarep Andi nanya maksud kadatangan kuring ka imahna, tapi bangun nu teu dijieun masalah. Manéhna malah katempo bungah, hanas nyumput.

Bi Surti teu katémbong deui tinggal kuring duaan jeung Andi. Teu nyangka Andi nu sok bérag boga masalah batin nu sakitu beuratna. Hirup mah ngan ukur pasangka-sangka, komo lamun nempona ukur sapaliwat; siga senang, siga bagja, buktina mah naon anu ku urang anggap genah bisa baé jadi sabalikna.

"Ngémutan naon?" ceuk Andi ngagareuwahkeun.

"Henteu!" walon kuring reuwas.

"Bohong, éta pangambungna beureum. Pasti bohong." Cenah, noél irung.

"Beureumna mah apan tadi dipencét ku anjeun!" baeud.

"Duh ari tos baeud kitu! Matak nineung. Mani sok hoyong...,"

"Hoyong naon?"

"Teu ah! Bongan linghas." Kuring seuri ku polahna.

"Andi teu naros, naha abdi ka dieu?" kuring nanya, daria.

"Teu naros ogé abdi mah tos terang,"

"Naon cik?"

"Pasti Tuan Putri panasaran ku cariosan Bi Surti kamari. Teu sangki képo ogé," pokna téh bari teu ngarérét-rérét acan. Kuring jadi asa salah, tapi lamun teu kitu kuring bakal terus panasaran. Can tangtu Andi bakal terus terang nu sabenerna.

"Punten, atuh!" cekéng bari neuteup manéhna. Andi jol imut bari ngarenghap jero.

"Teu nanaon, berarti abdi teu kedah capé ngawartosan. Ayeuna sadayana tos jelas kanggo Rahma, yén lalakon abdi sapertos kitu. Sagala rupina tos diatur ku Alloh. Abdi kaleungitan Kinan, Alloh ngintun Rahma kanggo gentosna; anu langkung sagala-galana." Andi ngarérét ku juru panonna.

"Hanjakal, anjeunna sapertos teu acan tiasa muka panto haténa kanggo abdi. Tapi abdi bakal sabar ngantosan dugi ka waktosna," pokna deui teu euleum-euleum.

Kuring tungkul rumasa kana caritaan Andi. Nalangsa ogé ngadéngé Andi nyarita kitu. Leungeunna ngusapan tonggong, "Badé dugi ka iraha Rahma nutup haté? Buka soca Anjeun, tingali payuneun aya abdi nu siap ngabagjakeun Anjeun. Urang wangun istana nu éndah, urang tinggalkeun sadaya lalakon burem urang; gentos ku lalakon nu éndah." Ucapanana ngabedahkeun cimata.

"Ya Alloh, nuhun abdi tos dikintun jalmi nu sholéh. Paparinan abdi cacaang supados abdi tiasa nampi kanyaah Andi." Ngagerentes jeroning ati.

***

Kacaturkeun Arya nu tunggara, anteng nganyam lamunan dibarengan ku inghak Enah nu jadi indungna. Awak Enah ngabegangan, nalangsa nempo nu jadi anak; kurang dahar kurang saré. Enah teu bisa nyalahkeun sasaha, manéhna sadar kana kanyataan yén Arya kitu téh lantaran lampah manéhanana. Kaduhung teu manggih tungtung, hanjakal ka nu geus kasorang. Rasa salah 'na haténa mingkin nyiksa. Katunggaraan Ningsih indungna Rahma nu geus direbut kabagjaanana baheula, ayeuna kaalaman ku anakna. Batin ngajerit, mun hadé milih kajeun manéhna nu ngaganti posisi Arya ayeuna; Arya nu teu tuah teu dosa kudu nandangan lara.

"Gugah kasép, kanyaah Ema...!" ceuk Enah dina sela-sela inghakna. Arya tetep ngaringkuk, teu boga alesan pikeun hudang.

Ustadz Jéjén getol ngalongokan, anjeunna ngarasa prihatin ka Arya. Tas babarengan digawé ayeuna Arya jadi kieu. Nisa ogé mindeng ngilikan, barang bawa saaya-aya.

"Kang Wira, kumaha upami Jang Arya téh diajak ka rorompok heula. Urang tarékahan, nyuhunkeun kamurahan Gusti Alloh. Sugan wé atuh aya kénéh harepan keur Jang Arya," Ustadz Jéjén nyarita ka Wira waktu isuk harita.

"Mangga wé abdi mah moal ngorétkeun, bungah nu aya. Nya mudah-mudahan mah tiasa cageur sabihari deui. Bingung abdi mah da teu tiasa nanaon." Wira bungah, némbalan Ustadz Jéjén.

Harita kénéh Arya titirah di bawa ka imah Kang Ustadz.

Mimiti dimandian, terus disalinan, buukna disisiran terus dibeungkeut. Ustadz Jéjén yakin haté Arya beresih, masih bisa dibebenah, disadarkeun tina sasabna.

Nisa satia marengan bapana ngurusan Arya, manéhna ogé teu weléh ngadunga pikeun cageurna Arya. Unggal isuk ngahuapan, ngajak ngobrol, dipangmacakeun buku-buku carita 'tokoh teladan'. Harepan Nisa, Arya aya réaksi deui jeung lingkunganana.

Hanca