KALANGSU 43

K A L A N G S U

_Yasana : Titin Wiarti_

Bagian ka-43

Euweuh basa sulit pikeun Andi mah, najan sagala sarwa dadakan tapi teu burung bukti. Uleman, riasan, kétring, jeung sagala rupana aya 'na tungtung curukna.

Rahma geus dicarék ka kantor, manéhna titah cicing di imah ngadagoan waktu.

Rahma ngarasa nalangsa, sabab manéhna teu siga calon pangantén awéwé séjénna. Nu biasana sibuk nyiapkeun sagalana pikeun acara, manéhna mah ngan ukur cicing ngadagoan paréntah ti Andi. Bobo-boro imahna dihias, kapan acarana ogé rék di gedung bari jeung geus diatur ku Andi.

"Tuan Putri, énjing ka butik aya acuk dua deui teu acan dicobian," cenah dina WA.

Isuk kénéh Rahma geus siap, pesen taksi muru ka butik Ibu Aminah. Najan teu loba nyieun bajuna, tapi ka hareupna geus aya rencana yén di dinya rék dipaké husus produksi baju pangantén.

Anjog ka butik, Bu Aminah mapagkeun, nuyun Rahma ngajak ka jero.

"Sok énggal cobian bilih aya nu kirang kantun nambihan," pokna ngasongkeun baju. Rap baju dipaké. Bu Aminah imut pinuh kareueus.

"Alhamdulillah, tos cekap. Mingkin geulis baé," cenah, teu weléh bari imut. Rahma teu tuluy balik, manéhna tuluy mantuan bébérés. Pikirna di imah ogé karesel euweuh kagiatan.

***

Pasosoré, Arya geus saged; dijekét, maké sapatu, helm ngagolér 'na luhur méja.

"Rék ka mana Jang?" Wira nanya ka anakna.

"Badé ngajemput Nisa ka terminal," témbalna bari ngeunteung.

"Geus lulus sugan sakolana?"

"Muhun, kamari Kang Ustadz ogé ka Tasik, tapi Nisa teu ngiring mulih, saurna aya kénéh nu kedah dilereskeun di kampusna."

"Nya atuh geura jung, mawa jas hujan bisi hujaneun!"

"Muhun, Pa! Ngabantun ieu ogé."

Arya ngadius muru ka terminalkeun, teu kungsi satengah jam gé geus nepi. Bubuhan patalimarga teu pati ramé.

Diuk 'na bangku, culang-cileung ngadagoan nu néang. Nisa geus nelepon Arya yén manéhna rék datang kira-kira jam tiluan. Témbong ti kajauhan Arya nyampeurkeun 'na motorna, Nisa ngawurkeun imutna nu kareueut, matak nyeblak kana haté.

"Tos lami?" ceuk Arya bari ngudar helm.

"Teu acan, paling ogé aya sapuluh menit mah."

Nisa ngiser diukna, méré tempat ka Arya sangkan diuk gigireunana.

"Badé teras ayeuna?" Arya nanya deui.

"Ké heula asa capé kénéh. Mobilna pinuh, abdi horéam ngantosan deui nu pengker. Kapaksa wé pasesedek," ceuk Nisa bari gegeber.

"Tos bérés di kampus téh?" ceuk Arya, gék gigireunana.

"Alhamdulillah! Atos, Kang! Kumaha Akang séhat? Mani pangling," ceuk Nisa bari neuteup.

"Alhamdulillah, pidu'a salira. Akang tos séhat deui, jagjag deui," Arya males neuteup.

"Syukur alhamdulillah atuh! sok damel naon baé pami siang téh?" Nisa hayangeun apal kagiatan Arya sabot tas gering.

"Akang mah siang wengi ogé apan ngantosan salira," pokna deui bari seuri. Nu diheureuyanna langsung tungkul, pameunteuna ngemu euceuy.

Arya cengkat, ngasongkeun helm ka Nisa, "Yu, ah! Bilih kabujeng hujan."

Arya ngajingjing tas Nisa laju diteundeun kana motor. Nisa nuturkeun.

Kira-kira satengah genep, Arya nepi ka imah Nisa. Diandeg ku emana sangkan ulah waka mulang, cuang dahar heula, cenah.

Sholat magrib berjamaah, Arya jadi Imam, Nisa jeung emana ngama'mum. Ustadz Jéjén mah Magrib di tajug, bubuhan loba barudak nu sok diajar ngaji ba'da Magrib.

Arya geus teu asa di imah batur, bubuhan kamari salila gering manéhna matuh di dinya. Diuk 'na korsi rohangan tengah, mukaan buku nu ngajajar 'na lomari tukangeunana.

"Kang Arya badé ngopi?" Nisa nyelengkeung ti dapur.

"Moal, ah! Warareg," témbalna bari jongjon mukaan buku.

Nisa nyampeurkeun bari leungeunna nanggeuy piring, eusina rupa-rupa kuéh.

"Sok dicobian, tadi abdi mésér di jalan."

Arya nyokot hiji laju dihuapkeun.

"Néng, dinten Minggu ngiring, yu!" ceuk Arya daria.

"Ka mana?" Nisa kerung.

"Ka Bandung, eu... Rahma pan badé nikah sareng Andi." Arya nyarita bangun nu karagok.

"Isin, ah!" ceuk Nisa.

"Naha isin? Pan sareng Akang."

"Moal nanaon kitu pami Nisa ngiring?"

"Nya moal atuh!"

"Muhun atuh Insyaallah, mugi wé teu aya halangan nanaon."

"Aamiin."

Arya ngarasa reugreug Nisa daék diajak ngaluuhan acara walimahan Rahma. Manéhna asa boga kakuatan pikeun nyaksian Rahma nu pernah disawang diuk jadi

praméswarina.

Hanca